Түркістан облысында балалардың құқыктарын қорғайтын жаңа жоба қолға алынып жатыр. Алдағы уақытта жоспарланған мерзімде жасөспірімдерді қатыгездіктен қорғайтын «Ел ертеңі – жас ұрпақ» бағдарламасы іске қосылады деп күтілуде. Бұл туралы бүгін Өңірлік коммуникациялар қызметінде өткен брифингте «Түркістан облысының Азаматтық Альянсы» заңды тұлғалардың қауымдастық нысанындағы бірлестігінің президенті Жамалбек Шәріпбек Жамалбекұлы мәлімдеді.
– Балалардың қауіпсіздігіне арналған мұндай бағдарлама бұрын-соңды болмаған. Бағдарламаның мақсаты әлеуметтік-мәдени ортаны қалыптастыру арқылы балаларға қатысты зорлық-зомбылықтың алдын алу. «Ел ертеңі – жас ұрпақ» жобасы «Береке» және «Түркістан облысы ата-аналар қауымдастығы» қоғамдық бірлестіктері, «Онлайн отбасы академиясымен» серіктестікте Түркістан облысы адами әлеуетті дамыту басқармасының қолдауымен жүзеге асырылуда. Бұл бастама жүзеге асса айтарлықтай нәтиже береді деген сенімдеміз, – деді Шәріпбек Жамалбекұлы.
«Азаматтық Альянсы» заңды тұлғалардың қауымдастық нысанындағы бірлестігі президентінің айтуынша, өңірде балаларға қатысты зорлық-зомбылық тиылмай отыр. Соңғы үш жылда отбасында балаға қатыгездік көрсету бойынша 150 оқиға тіркелген. Осындай олқылықтарды болдырмау мақсатында «Ел ертеңі – жас ұрпақ» бағдарламасы қолға алынуда.
Өз кезегінде «Түркістан облысының ата-аналар қауымдастығы» қоғамдық бірлестігінің төрайымы, жоба серіктесі Ақбаян Жакипова «Ел ертеңі – жас ұрпақ» бағдарламасы жөнінде баяндады.
– Балаларға қатысты зорлық-зомбылықтың кері әсері өмір бойы сақталуы мүмкін, олар денсаулығына, мінез-құлқына және одан кейінгі зорлық-зомбылыққа себеп болады. Сондықтан кешенді бағдарлама мектептердің педагогикалық ұжымдарының, оқушыларының, ата-аналар комитеттерінің әлеуетін арттыру арқылы отбасындағы және мектептердегі зорлық-зомбылықтың алдын-алу және болдырмауға ықпал жасауға бағытталып отыр, – деді А.Төлбасықызы.
