Төлеби ауданы Жоғарғы Ақсу ауылдық округі құрамында екі елді мекен бар. Мәдени және Сарқырма ауылдары. Ауданнан шалғай аймақта орналасқанына қарамастан бүгінде инфарқұрылымдық жүйелері шешімін тапқан, табиғи газы пайдалануға берілген, электр желілері мен бағаналары жаңартылып, жолдары асфальттанған ауылдар қатарында. Мәдени ауылында «Жастар саябағы», «Ардагерлер саябағы» көпшіліктің демалыс орнына айналса, Сарқырама елді мекеніндегі Д.Қонаев көшесінің бойындағы Ш.Төлтебаев атындағы саябақтың құрылысы аяқталуға жақын.
Демалыс аймағының құрылыс жұмысын жеке кәсіпкер Сарқырама елді мекенінің тумасы Төлтебаев Мұрат Шерімұлы жүргізуде. Жоба құны 700 млн теңге. Саябақтың жер көлемі 1.5 га. Ауыл тұрғындарының демалыс орнына айналғалы тұрған саябақта аллеялар, фонтан, түнгі жарық, үлкендер мен кішкентайларға арналған бассейндер, ашық аспан аясындағы мейрамханалар, жазға орындықтар және күн сәулесінен қорғайтын төбесі жабық скамейкалар бар. Сондай-ақ, саябақ аумағында қырым ағаштары, көлеңке түсіретін тал – теректер, көздің жауын алатын әсем гүлдер отырғызылған.
Сондай-ақ, аудан аумағында халықтың игілдігіне арналған жобалар жүзеге асуда. Төлеби ауданы Мәдени елді мекеніндегі Бәйшешек көшесі бойында жарықтандыру және аяқ жолдардың құрылысы жүргізіліп жатса, С.Тлеуов көшесіне жаңадан тротуар төселді. Сондай-ақ, осы елді мекенге топтасқан «Қаратөбе» су қоймасынан келетін ашық су көздері арқылы ауызсу мәселесі шешімін тапқан. Одан бөлек, Жаңаталап көшесіне жаңадан жол төселсе, Сарқырама елді мекеніне кіре берістегі қоршауларға ауыл көркіне ажар беру мақсатында табиғатының көріністері, аңдардың, құстардың суреттері салынып, нақыл сөздер жазылған. Сонымен қатар, Д.Қонаев көшесінің бойындағы тұрғын үйлерге жеке кәсіпкердің демеушілігімен біркелкі қасбеттер жасалып, әрбір үйдің ауласы гүлзарларға айналып отыр.
