Мәжіліс депутаттары Сарыағаш ауданындағы мәдениет нысандарының жұмысымен танысты. Бұл туралы Сарыағаш ауданы әкімдігінің баспасөз қызметі хабарлады.
Сарыағаш аудандық орталықтандырылған кітапханалар жүйесінің жұмыс барысымен танысуға келген Қазақстан Республикасының Парламенті Мәжілісінің депуттатары, "Nur Otan" партиясының Мәжілістегі фракциясының мүшелері Мыңбай Дархан Қамзабекұлы мен Бейсенбаев Елнұр Сабыржанұлы кітапхананың бүгінгі таңда атқарып жатқан жұмыстарымен танысып, бір жүйеге енген көп қырлы кітапхананың ақпараттық ресурстары және тың идеялары, іске асырып жатқан жобалары мен жаңалықтары турасында ой өрбітті. Кітапхана директоры Кульгинова Қалбибі Сейдірқызы жалпы кітапхана саласының қыр-сыры жөнінде кеңінен ақпарат беріп, кітапхана саласы заманауи бағытта жұмыс жасайтынын, кітапханада «Адалдық алаңы» жобасы аясында «Парасат жолы» бөлімін ашқандығын хабарлады. Республикадан келген қонақтар кітапхана қызметкерлері қоғамға қызмет көрсетуінің заман талабына қарай ауқымның кеңдігіне қарамай барлық мәдени функцияларды игере отырып өз қызметін жандандырып отырғанына куә болды. Дархан Қамзабекұлы қоғамның оқу мәдениетін, интеллектуалды ақпараттық мәдениетін және сонымен қатар дәстүрлі кітап оқу арқылы ұлттық рухани құндылықтардың дамуына зор үлес қосып отырған мекеме ретінде жоғары баға беріп мерейін асырды.
Депутаттар кітапханашылардың өз қызметіне деген жауапкершілігі мол, кәсіби біліктілігі жоғары, белсенді, идеяшыл, талапшыл, ізденімпаз екенінің дәлелі ретінде ерекше үлгіде ұйымдастырылған көрмелерге назар аударды. Кітап көрмесінің пішінін таңдау аясында тақырыптың мазмұнын ашудағы тиімді тәсілдерді қолданудағы ұйымдастырылған көрмеге – кітапхана өнерінің туындысы, шығармашылық ізденістің жемісі, шабытты жұмыстың нәтижесі екенін айтып кітапханашылардың беделін көтерді.
