Жаңа оқу жылында Түркістан облысында 15 жаңа мектеп пайдалануға берілді. Облыс аумағында жаңадан салынған тағы 29 білім ұясы жыл соңына дейін пайдалануға беріледі деп күтілуде. Бұл туралы Түркістан облысы әкімінің баспасөз қызметі хабарлады. Түркістан облысы бойынша жалпы 78 жаңа мектептің құрылысы жүргізілуде. Олардың дені бала саны көп, тұрғындары тығыз орналасқан ауылдарда бой көтерді. Жаңа мектептер заманауи роботехника, ІТ-технологиялар кабинеттерімен жабдықталған.
Жаңадан ашылған білім ұялары Сауран, Сарыағаш, Мақтаарал, Жетісай, Бәйдібек, Түлкібас аудандары мен Кентау және Түркістан қаласының әкімшілік – іскерлік орталығында орналасқан. Жаңа оқу жылында Сарыағаш ауданы, Жібек жолы ауылдық округінде №58 Ә.Марғұлан атындағы орта мектепке қосымша 300 орындық білім ошағы жаңадан пайдалануға берілді. 2 гектар аумақта орналасқан жаңа ғимаратта оқу орнымен қатар спортзал, асхана және шеберханалар орналасқан.
Жаңа оқу жылында өңірде 50 мыңнан астам бүлдіршін мектеп табылдырығын аттады. Бір ғана Сарыағаш ауданында бүгін 3 мың бала алғаш рет мектепке барды. Ауданда 60 мыңдай оқушы білім алады.
Айта кетері, халыққа арнаған бүнігі Жолдауында Президент Қасым-Жомарт Тоқаев:
- Орта білім беру жүйесіндегі өткір проблеманың бірі – мектептердегі орын тапшылығы. 225 мың оқушыға орын жетіспейді.
Шұғыл шара қабылдамасақ, 2025 жылға қарай орын тапшылығы 1 миллионға жетеді. Мен 2025 жылға дейін кемінде 800 мектеп салу туралы тапсырма берген болатынмын. Бүгін оның санын бір мыңға жеткізуді міндеттеймін,-деді.
