Қазақстан Республикасы Ақпарат және қоғамдық даму министрлігінің қолдауымен «Азаматтық бастамаларды қолдау орталығы» коммерциялық емес акционерлік қоғамының мемлекеттік гранты аясында Түркістан облысының Жетісай ауданындағы Асықата кентінде «Мырзашөл» Ақпараттық-білім беру орталығы өз жұмысын бастады. Қазіргі таңда орталық мамандары жұмыс күші артық өңірлерден шыққан жастарға жоғары және жоғары оқу орнынан кейінгі, техникалық және кәсіптік білім беруге бағытталған «Мәңгілік ел жастары – индустрияға!» («Серпін») жобасы бойынша ақпараттық кеңес беру жұмыстарын жүргізуде. Сонымен қатар, аудандағы жас отбасылар мен мамандығы бар, бірақ, жұмымсыз жастарды жұмыс күші тапшы өңірлер саналатын Ақмола, Ақтөбе, Атырау, Шығыс Қазақстан, Батыс Қазақстан, Қарағанды, Қостанай, Павлодар және Солтүстік Қазақстан сынды облыстарға жұмысқа орналастырумен айналысады. Талапкерлер мен ата-аналарға да тегін қызмет көрсететін орталықта тұрғындардың білім-ғылым, құқықтық мәселелері бойынша кеңестер де беріледі.
Айта кетейік, аталмыш орталықтың ашылуына Нұр-Сұлтан қаласындағы «Зерттеуші» Республикалық ғылыми-білім беру орталығы» жекеменшік мекемесі мұрындық болып отыр.
