Түркістан облыстық медициналық ұйымдарында коронавирус және пневмония індеттерімен күресу мақсатында құрылған 380 мобильді топ 30 мыңнан астам науқастың үйлеріне барып ем көрсеткен. Бұл туралы Қоғамдық денсаулық басқармасы мәлімет таратты.
Дәрігерлер мен орта буын медицина қызметкерлерінен құрылған арнайы топтар коронавирустың симптомсыз түрімен ауырған және пневмонияға шалдыққан науқастар мен басқа да аурулармен ауыратын азаматтарға тиісті ем-дом шараларын жасады. Мобильді топтар көлік және қорғаныс киімдері мен басқа да қажетті медициналық құралдармен толық қамтамасыз етілген.
Жалпы, халық саны екі миллионнан астам Түркістан облысында орналасқан медициналық мекемелерде 5196 дәрігер және 18 мыңнан астам орта буын медицина қызметкері жұмыс істейді. Жыл басынан бері 1000-ға жуық маман біліктілігін арттырған. Дәрігерлер Ресейдің клиникаларында біліктілік арттырып, әріптестерімен тәжірибе алмасты. Өңірде денсаулық сақтау саласын дамыту және емдеу мекемелерінде ақпараттық жүйелерді енгізу бойынша да жұмыстар жалғасуда. Облыс бойынша халықтың электрондық денсаулық төлқұжаты 100 пайыз жасақталды.
Облыста эпидемиологиялық ахуал тұрақты. Өңірде COVID-19 инфекциясын жұқтырған 3193 науқас тіркелген. Бір күндік өсім - 0,7 пайыз. Инфекциялық госпитальдардан 2811 адам жазылып шықты.
