Үшінші мегаполистегі халық көп шоғырланған аймақ – Абай ауданы.Төскейде жайылған төрт түлігі өрісін кеңейтіп, текті азаматтары түрлі кәсіптің тетігін ұстап отырған ауданның жақсы жаңалықтары көп. Әсіресе «Жұмыспен қамтудың жол картасы», «Бизнестің жол картасы-2025» мемлекеттік бағдарламасы толықтай жүзеге асырылыр отыр.
Абай ауданы аумағында жалпы, 3 553 кәсіпкерлік нысан орналасқан. Оның ішінде «СКАТ» әуе компаниясы, «Зерде-Фарма», «Голд Алюминиум», «Электрокомплект-1», сияқты ірі кәсіпорындар бар.
Өткен жылы жалпы аудан кәсіпкерлерінен жергілікті бюджетке салықтан 4,2 млрд. теңгеге түсім түскен. 2020 жылғы жоспар бойынша Абай ауданы бойынша 68 кәсіпкерлік нысанға 4,1 млрд. теңге жеке инвестиция тартылып, жұмыспен қамтылғандар саны 449 адамды құраған. Ал 2021 жылға 12 млрд. теңге инвестиция тарту жоспарлануда.
Ал ауданның жалпы ауыл шаруашылығы жер көлемі 26 мың гектардан асады. Өткен жылы төрт түлік мал (жылқы, қой, ірі қара) саны 2019 жылмен салыстырғанда 44% пайызға артқан. 2020 жылға жеке инвестицияға 197 млн. теңге көлемінде субсидия бөлінген, оның ішінде, лизингке сатып алынған ауыл шаруашылық техникасын 2,1 млн. теңгеге субсидия алған. Алма бағына 15,9 млн. тенге, қоймалар салуға 178,8 млн. теңге, мал сатып алуға, техника және технологиялық жабдық сатып алуға 809 мың. теңге алған.
Cонымен қатар, Абай ауданы бойынша “Асыл тұқымды мал шаруашылығын дамытуды, мал шаруашылығының өнімділігі мен өнім сапасын арттыруды субсидиялау “ бағдарламасымен 344 млн. теңге субсидия алған, оның ішінде, қой шаруашылығына 84 млн. теңге, ірі қара малға 75 млн. теңге, бал ара шаруашылығына 13,8 млн. теңге, тауық еті мен жұмыртқа өндірісіне 154 млн. теңге ұлғайып отыр.
"Бұл көрсеткішті жылдан жылға арттырудамыз. Мұның бәрі аудан экономикасын көтермесе, әлсіретпейтін факторлар",- дейді Абай ауданының әкімі Бұхарбай Парманов.
