Тәуелсіздіктің 30 жылдығына орай Шымкент қаласының әкімі Мұрат Әйтеновтің бастамасымен үшінші мегаполисте шахматтан жасөспірімдер арасында Қазақстан чемпионаты ұйымдастырылмақ. Чемпионатты Шымкент қаласы әкімдігі мен Қазақстандық шахмат федерациясы қолға алуда. «Шымкент – еліміздің шахмат астанасы» брендін қалыптастыру аясында қолға алынған спорттық сайыс алдағы шілде айының 20-30 жұлдызы аралығында өтеді деп жоспарланып отыр.
Іс шараның мақсаты - халықаралық шахмат аренасында Қазақстанның оң имиджін қалыптасыра отырып, Шымкентті зияткерлік шаһарға айналдыру. Шахматтан жаңа есімдерді анықтау. Сондай-ақ жеке чемпионатқа еліміздің барлық аймағынан жиналған ойыншылар мен олардың ата-аналарын және жаттықтырушыларын қоса есептегенде 1500 адам үшінші мегаполиске ат басын бұрмақ. Бұл әсем қаламыздың туризмін дамытуға да септігін тигізеді дейді салаға жауаптылар.Яғни, аталған онкүндікте қонақтарымызға шаһарды жан-жақты таныстыруға айрықша күш салынып отыр.
Айта кетейік, шахматтан жасөспірімдер арасында Қазақстан чемпионаты мемлекеттік бюджеттен еш қаржысыз ұйымдастырылады. Жарыс "Black Rock Business"ЖШС-нің демеушілігімен өтеді. Жалпы сайыстың жүлде қоры 2 880 000 теңгені құрайды. Жеңімпаздар әлем және Азия чемпионаттарының жолдамасына ие болмақ. Ал чемпионаттың талап-ережелерімен Қазақстан шахмат федерациясының ресми сайтынан танысуға болады.
