Елбасы Нұрсұлтан Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында қамтылған әр мәселе қоғам үшін зор маңызға ие. Стратегиялық құжатта негізінен қазақстандықтардың әл-ауқатын арттырып, тұрмысын жақсарту жайлы кеңінен айтылды. Оның ішінде Елбасы мүмкіндігі шектеулі тұлғаларға арналған «кедергісіз орта» қалыптастыруға байланысты бірқатар тапсырма берген болатын. Атап айтқанда қоғамдық орындар мүгедек жандардың жүріп-тұруына қолайлы болуы керектігі және мүмкіндігі шектеулі азаматтар қажетті жеріне қиналмай баруын қамтамасыз ету үшін инватакси қызметін ашу айтылған болатын.
Осы ретте Шымкентте биыл инватакси қызметін пайдалануға 500-ден астам азамат өтініш білдірген. Бүгінде Шымкентте жұмыспен қамту және әлеуметтік қорғау басқармасы тарапынан қаладағы мүмкіндігі шектеулі жандар үшін кедергісіз орта қалыптастыруда тиісті шаралар атқарылып жатыр. Мүгедектігі бар азаматтардың белсенді өмір сүру салтын қалыптастыру мақсатында инватакси ұйымдастырылған.
Шымкент қаласында мүгедектерге арналған такси қызметі пайда болғанына биыл 10 жыл. Жоба «Қалалық мүгедектер қоғамы» бірлестігінің бастамасымен жүзеге асқан. Инватакси қызметін жыл басынан бері 500-ден астам азамат қызмет алуға өтініш тапсырған. Күніне 170-180 тапсырыс қабылданады. Өтініш беруші 1 күн бұрын диспетчерге (8 (7252) 57-70-06) хабарласып тапсырыс қалдыра алады. Инватакси қызметі тегін. Бекітілген 18 автокөлік арнайы жылжымалы құрылғымен және кресло-арбаларды орнатуға арналған құралдармен жабдықталған. Арнайы көліктермен азаматтар қала ішіндегі қалаған мекен-жайына бара алады.
Айта кетейік, бүгінде Шымкент қаласында 37 046 мүмкіндігі шектеулі азамат тіркелген. Оның ішінде: бірінші топ-3324, екінші топ-14 950, үшінші топ – 12 288. Ал 18 жасқа дейінгі 6484 мүгедек бала тіркелген.
