Өткен жылы Шымкент қаласында «Нұрлы жер» бағдарламасы аясында 12 жеделсаты ауыстырылып, комиссиялық сынақ жүргізіліп, тіркеуге алынған. Бұл туралы Қалалық орта сапасы және бақылау басқармасының басшысы Ғалымжан Өтенбаев мәлімдеді. Басқарма басшысының айтуынша бүгінгі таңда басқарма тарапынан жүргізілген түгендеу жұмыстарының нәтижесінде 2016-2020 жылдар аралығында пайдалануға тапсырылған тұрғын үйлерге қызмет көрсететін 66 лифтінің жүк көтергіш механизмдерді пайдалану кезіндегі өнеркәсіптік қауіпсіздікті қамтамасыз ету талаптары сақталмай жұмыс істеп жатқаны белгілі болған.
«Осы тұста айта кеткім келіп отыр, басқарма қала аумағындағы лифтілерді, эскалаторларды және траволаторларға түгендеу жұмыстарын жүргізеді. Кез келген мекемеге, тұрғын үйге лифт орнатыларда бізге тіркелуі тиіс. Қазір қалада 548 лифт бар. Тұрғын үйлерде орнатылған 401 лифттің 397-ы жұмыс істеп тұр. 26 лифттің пайдалану мерзімі ұзартылды. Шаһарымызда 1990 жылға дейін орнатылған 53 лифт бар екен. Иә, ескірсе де жұмыс істеп тұрғандықтан былтыр оның 12-сінің мерзімін ұзартып бердік. Лифт жыл сайын сынақтан өтуі тиіс»,- деген басқарма басшысы жеделсатылардың жаңаруына «Нұрлы жер» мемлекеттік бағдарламасының шарапаты тиіп отырғанын тілге тиек етті. Көпқабатты үйлер мен ғимараттардағы жеделсатыларды жаңарту, орнату жұмыстары алдағы уақытта да жалғасын таба бермек.
